Հայաստանի խորհրդարանը երկրորդ և վերջնական ընթերցմամբ հաստատել է «Խաղային գործունեության կարգավորման մասին» օրենքում փոփոխություններ կատարելու նախագիծը, որի հեղինակը «Քաղաքացիական պայմանագիր» խմբակցության պատգամավոր Հայկ Սարգսյանն է։ Այս փոփոխությունները նպատակ ունեն սահմանափակել սոցիալապես խոցելի խաղացողների հասանելիությունը առցանց շահումով խաղերին։
Նոր օրենսդրության համաձայն՝ առցանց խաղատներում խաղալու իրավունք չեն ունենա պետական սուբսիդիաներ ստացող քաղաքացիները (օրինակ՝ հիփոթեքային վարկերի, ուսման վարձի, գյուղատնտեսական վարկերի համար), սոցիալական նպաստ ստացողները, բացի թոշակից այլ եկամուտ չունեցող կենսաթոշակառուները, սնանկության գործընթացի մասնակիցները, ինչպես նաև այն անձինք, որոնց տարեկան եկամտի ավելի քան 40%-ը ուղղվում է վարկերի մարմանը։
Այս սահմանափակումներին ենթակա չենք խաղացողները, սակայն նրանց համար նախատեսված է մեկ այլ սահմանափակում։ Նրանց կողմից խաղադրույքների վրա ծախսվող գումարները չպետք է գերազանցեն նրանց տարեկան եկամտի 20%-ը։
Հայաստանում գործող բոլոր առցանց խաղատների հարթակները, ինչպես տեղական, այնպես էլ արտասահմանյան, պարտավոր կլինեն իրենց ինտերֆեյսներում տեսանելի տեղում տեղադրել ավտոմատ արգելափակման կոճակ։ Այս կոճակի միջոցով մոլախաղերի նկատմամբ կախվածությունը գիտակցող օգտատերերը մեկ սեղմումով կկարողանան արգելափակել իրենց հաշիվը ոչ միայն տվյալ հարթակում, այլև երկրում գործող բոլոր մյուս հարթակներում։ Արտասահմանյան հարթակները, որոնք չեն ենթարկվում Հայաստանի օրենսդրության պահանջներին, արգելափակվում են երկրում։
Հայկ Սարգսյանի կողմից ներկայացված տվյալների համաձայն՝ 2017-2025 թվականների ընթացքում Հայաստանի բնակիչների կողմից առցանց խաղատներում կատարված խաղադրույքների ծավալն աճել է ավելի քան 35 անգամ՝ հասնելով 7.41 տրիլիոն դրամի։ Չնայած այն հանգամանքին, որ խաղադրույքների ծավալը, որպես կանոն, մի քանի անգամ փոքր է ներդրված իրական գումարից, այնուամենայնիվ, նույնիսկ եթե վերցնենք 1:10 հարաբերակցությունը, խոսքը վերաբերում է 2 մլրդ դոլարի չափով գումարի։
Հարկ է նշել, որ խաղային բիզնես ունեցող ընկերությունների հարկերը կազմում են բյուջեի ընդհանուր եկամուտների ընդամենը 1%-ը։
Նախկինում օրենքով առցանց խաղատներում խաղադրույքներ կատարելն արգելված էր մինչև 21 տարեկաններին, ինչպես նաև պետական ծառայողներին և զինծառայողներին։